Utdanningsutvalet ved UiB lyser kvart år ut midlar til kvalitetsutvikling i utdanninga. I 2025 var ramma på 2,1 millionar kroner, og fagmiljøa kunne søke om støtte gjennom ordninga for insentivmidlar til utvikling av utdanningskvalitet.
For 2026 blir det gjort fleire endringar i både prosess og innhald i utlysinga. Utdanningsutvalet har vedteke at:
Vurderingskomitéen skal ha fleirtal av meritterte undervisarar, og ikkje av medlemer frå utdanningsutvalet, slik praksisen har vore dei siste åra.
Mandatet til vurderingskomitéen skal justerast, mellom anna slik at alle søkarar skal få skriftlege tilbakemeldingar på søknadene sine.
I tillegg løyvde universitetsstyret i november eigne midlar til satsinga Førsteårstudenten, som skal bidra til å redusere fråfall tidleg i studieløpet. Desse midlane blir no tekne inn i den samla utlysinga for 2026, med dei føringane styret har sett.
Om lag 3,8 millionar kroner blir lyst ut
Samla ramme for utlysinga Midlar til kvalitetsutvikling i 2026 vil vere om lag 3,8 millionar kroner. Midlane blir fordelte på tre kategoriar:
Små prosjekt/forprosjekt knytt til satsinga på førsteårstudenten
Pilotprosjekt knytt til satsinga på førsteårstudenten
Andre prosjekt knytt til kvalitetsarbeid i utdanninga
Tidspunkt for utlysing og tildeling
Utlysingstekst blir publisert innan utgangen av februar.
Søknadsfrist er planlagt til starten av mai.
Tildeling blir vedteke i Utdanningsutvalet sitt møte 17. juni.
I mellomtida viser vi til Sak 5/26: Midlar til kvalitetsutvikling 2026–2029, som legg rammene for både utlysinga og tildelingsprosessen. Fagmiljøa blir oppmoda om å starte arbeidet med prosjektidéar allereie no, ettersom det kan ta tid å utvikle gode søknader.
Kilde:
Foto: UiB